അടുക്കളയ്ക്കായ് അടുക്ക് കൃഷി അര്‍ക്ക വെര്‍ട്ടിക്കല്‍ ഗാര്‍ഡന്‍
(അപേക്ഷകള്‍ സമര്‍പ്പിക്കാവുന്ന അവസാന തീയതി 10-12-2023)
പച്ചക്കറി കൃഷിയില്‍ സ്വയം പര്യപ്തത കൈവരിക്കുകയും വിഷരഹിത പച്ചക്കറി ഉത്പാദനം വര്‍ദ്ധിപ്പിക്കുന്നതിനുമായി സംസ്ഥാനത്തെ നഗരങ്ങളിലും നഗര പ്രാന്ത പ്രദേശങ്ങളിലും ഭൂരഹിത കൃഷി പ്രോത്സാഹിപ്പിക്കുന്നതിന്റെ ഭാഗമായി ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ഹോര്‍ട്ടിക്കള്‍ച്ചര്‍ റിസര്‍ച്ചിന്റെ (ഐ.സി.എ.ആര്‍.) സാങ്കേതിക സഹായത്തോടെ സംസ്ഥാന കൃഷിവകുപ്പ് - സംസ്ഥാന ഹോര്‍ട്ടിക്കള്‍ച്ചര്‍ മിഷന്‍-കേരള മുഖാന്തിരം രാഷ്ട്രീയ കൃഷി വികാസ് യോജന എന്ന കേന്ദ്രാവിഷ്‌കൃത പദ്ധതിയില്‍ ഉള്‍പ്പെടുത്തി സംസ്ഥാനത്ത് വെര്‍ട്ടിക്കല്‍ മാതൃകയില്‍ പച്ചക്കറി കൃഷി നടപ്പിലാക്കുവാന്‍ ലക്ഷ്യമിടുന്നു.ഒരു സ്‌ക്വയര്‍ മീറ്റര്‍ വിസ്തൃതിയില്‍ സ്ഥാപിക്കുവാന്‍ കഴിയുന്ന 4 അടുക്കുകളുള്ള അര്‍ക്ക വെര്‍ട്ടിക്കല്‍ ഗാര്‍ഡന്‍ സ്ട്രച്ചറിനൊപ്പം 16 ചെടിച്ചട്ടികള്‍, 80 കിലോഗ്രാം പരിപോഷിപ്പിച്ച നടീല്‍ മാധ്യമം (ചകിരിച്ചോര്‍), ചീര, മുളക്, പാലക്ക്, മല്ലി, കത്തിരി, തക്കാളി തുടങ്ങിയ വിളകളുടെ വിത്ത്, സസ്യ പോഷണ-സംരക്ഷണ പദാര്‍ത്ഥങ്ങള്‍, 25 ലിറ്റര്‍ സംഭരണശേഷിയുള്ള തുള്ളിനന സൗകര്യം എന്നിവ ഉണ്ടായിരിക്കുന്നതാണ്. ചക്രങ്ങള്‍ ഘടിപ്പിച്ചിട്ടുള്ളതിനാല്‍ സൂര്യപ്രകാശ ലഭ്യതയ്ക്കനുസരിച്ച് സ്ഥാനം മാറ്റാവുന്നതാണ്.
നിബന്ധനകള്‍
- ഗുണഭോക്താക്കള്‍ കേരള സംസ്ഥാനത്തിലെ താമസക്കാരായിരിക്കണം.
- അപേക്ഷകള്‍ സംസ്ഥാന ഹോര്‍ട്ടിക്കള്‍ച്ചര്‍ മിഷനില്‍ ലഭിക്കുന്ന മുന്‍ഗണനാ ക്രമത്തിലായിരിക്കും ഗുണഭോക്താക്കളെ നിശ്ചയിക്കുന്നത്.
- അര്‍ക്ക വെര്‍ട്ടിക്കല്‍ ഗാര്‍ഡന്‍ സ്ട്രക്ച്ചര്‍, പദ്ധതിയുടെ ഉദ്ദേശ്യലക്ഷ്യങ്ങള്‍ക്കായി അല്ലാതെ മറ്റ് ആവശ്യങ്ങള്‍ക്കായി ഉപയോഗിക്കുവാന്‍ പാടില്ല. ഏതെങ്കിലും തരത്തിലുള്ള ദുരുപയോഗം ശ്രെദ്ധയില്‍ പെട്ടാല്‍ സബ്‌സിഡി തുക സര്‍ക്കാരിന് മടക്കി നല്‍കാന്‍ ഗുണഭോക്താവ് ബാധ്യസ്ഥന്‍ ആയിരിക്കും .
- നിര്‍ദ്ദിഷ്ട ഇടവേളകളിലെ സംസ്ഥാന ഹോര്‍ട്ടിക്കള്‍ച്ചര്‍ മിഷന്റെ പദ്ധതി നിര്‍വ്വഹണ പരിശോധനകളുമായി ഗുണഭോക്താക്കള്‍ പൂര്‍ണ്ണമായും സഹകരിക്കേണ്ടതാണ്.
- അര്‍ക്ക വെര്‍ട്ടിക്കല്‍ ഗാര്‍ഡന്‍ സ്ട്രക്ച്ചര്‍ ഇന്‍സ്റ്റാള്‍ ചെയ്യുവാനായി കൊണ്ടുവരുമ്പോള്‍ തിരഞ്ഞെടുക്കപ്പെട്ട ഗുണഭോക്താവ് നിര്‍ബന്ധമായും സ്ഥലത്തുണ്ടായിരിക്കണം.
- സ്ട്രക്ച്ചര്‍ ഇന്‍സ്റ്റാള്‍ ചെയ്യുന്ന വേളയില്‍ അപേക്ഷകര്‍ ഒപ്പിട്ട് സമര്‍പ്പിക്കുന്ന അപേക്ഷയോടൊപ്പം ആധാര്‍ നമ്പര്‍ നിര്‍ബന്ധമായും രേഖപ്പെടുത്തേണ്ടതാണ്.
- ഒരു അപേക്ഷകന് ഒന്ന് എന്ന രീതിയില്‍ നിജപ്പെടുത്തിയിരിക്കുന്ന അര്‍ക്ക വെര്‍ട്ടിക്കല്‍ ഗാര്‍ഡന്‍ സ്ട്രക്ച്ചര്‍, 2021-22 സാമ്പത്തിക വര്‍ഷം കൈപ്പറ്റിയിട്ടുള്ള ഗുണഭോക്താക്കള്‍ അപേക്ഷിക്കുന്നതിന് അയോഗ്യരാണ്.
- 22100/- രൂപ ആകെ ചിലവ് വരുന്ന ഒരു യൂണിറ്റ് അര്‍ക്ക വെര്‍ട്ടിക്കല്‍ ഗാര്‍ഡന്‍ 15525/- രൂപ ധനസഹായത്തോടെയാണ് സംസ്ഥാന ഹോര്‍ട്ടിക്കള്‍ച്ചര്‍ മിഷന്‍ ഗുണഭോക്താക്കള്‍ക്ക് ലഭ്യമാക്കുക. ഗുണഭോക്തൃവിഹിതമായ6575/- രൂപ അപേക്ഷയോടൊപ്പം ഓണ്‍ലൈനായി മുന്‍കൂര്‍ അടയ്‌ക്കേണ്ടതാണ് .
- അപേക്ഷകള്‍ സമര്‍പ്പിക്കാവുന്ന അവസാന തീയതി 10-12-2023